Ubwoba bw’Igitero  cy’Ibyihebe hafi y’Umujyi wa Rubavu

Ubuyobozi  bw’Umujyi wa Goma  ufatwa nk’Icyicaro gikuru cy’Intara ya Kivu y’Amajyaruguru  muri Repubulika Iharanira Demokarasi  ya Congo  bwasabye abaturage kuba maso ndetse no gutanga amakuru  ku muntu wese  babona bakekaho  umugambi mubisha w’Igitero cy’Ibyihebe.

Mu itangazo  ryashyizweho umukono n’umuyobozi  akaba  na Komiseri wa Polisi  y’uyu Mujyi ,Kabeya Makossa  Francois,  rivuga ko  hagiye kubaho  gusaka  mu  buryo budasanzwe bwateguwe neza  kandi buhoraho  umuntu wese winjira cyangwa  ushohoka ahantu  hahurira abantu benshi.

Iri tangazo ryashyizwe hanze  tariki 27 Mutarama 2023, rikomeza rivuga ko  uku gusaka  bizakorwa  ahantu  harimo  mu mashuri, Insengero , mu masoko  rusange , mu tubari ndetse no mu tubyiniro mu rwego rwo kwirinda   igitero cy’Ibyihebe.

Ubuyobozi bw’Umujyi wa Goma butangaje ibi  nyuma y’iminsi  mike Urwego rw’Ubutasi bwa Repubulika Iharanira Demokarasi  ya Congo  butangaje ko  amakuru  bufite avuga ko hari igitero  cy’Iterabwoba  kizagabwa  mu murwa mukuru wa Kinshasa.

Uru rwego   icyo gihe rwavuze  ko kugeza umunsi rwashyiriye hanze iri tangazo  rwabaga   rutaramenya   agace  kagabwaho iki  gitero   gusa amakuru ahari  yavugaga ko  cyashobora kuba ku  wa Kane  tariki 12 Mutarama 2023.

Nyuma y’iri tangazo ry’Intasi za Kinshasa,Umutwe w’iterabwoba wa Islamic State wigambye ko ariwo wagabye igitero mu rusengero ruherereye i Kasindi kikagwamo abantu 14.

Iki gitero cy’iterabwoba cyagabwe ku Cyumweru tariki 15 Mutarama 2022, bukeye bwaho ku wa Mbere, Islamic State ibinyujije mu kinyamakuru cyayo, Aamaq news yavuze ko ariyo yateze igisasu muri uru rusengero ndetse iragituritsa.

Uyu mutwe wakomeje uvuga ko uzakomeza guhangana na Leta ya Congo mu gihe cyose ingabo zayo zigihanganye n’imitwe igendera ku mahame ya Islam.

Umujyi wa Goma uhana  imbibi  n’uwa Rubavu mu Ntara y’Uburengerazuba  bw’u Rwanda.

Imibare yo mu mwaka wa 2021 , igaragaza ko uyu muyji wa Goma  wari utuwe n’abaturage 2,100,000, ukaba ukunda kugendwa n’abanyarwanda  benshi cyane  mu bikorwa by’ubushabitsi bwa buri munsi.

Abakurikiranira hafi ibirimo kubera muri  aga gace , bahise bahuza iri tangazo  ryatanzwe n’Ubuyobozi bw’Umujyi wa Goma  n’ubwoba nyuma y’uko Inyeshyamba za M23  zifashe Umuyji wa Kitshanga.

Uku gusaka gushobora kwibasira  umuntu wese uvuga ikinyarwanda cyane abo mu bwoko bw’Abatutsi  bashinjwa kuba intasi za M23 , bityo Abanyarwanda  bajya mu mujyi wa Goma barasabwa kwitwararika  kuko bashobora kubigenderamo.

(Soma)